O xurado do II Certame de Relato Curto Jaime Olmedo Limeses acordou conceder o premio na categoría de relato infantil á obra O alento do cantil, da autoría de Matías V.R., alumno do CPR Carmelitas de Ourense.
A entrega de premios terá lugar o próximo sábado 17 de maio no Museo de Pontevedra, nun acto que reunirá ás persoas galardoadas e ás súas familias, así como a representantes do ámbito cultural e educativo.
O certame, promovido por Avigal e Antela Editorial, nace coa vontade de honrar a figura de Jaime Olmedo Limeses e de fomentar a creación literaria en lingua galega entre as xeracións máis novas. Nesta segunda edición, a convocatoria acadou unha grande participación, con máis de 200 relatos recibidos procedentes de máis de 40 centros educativos de toda Galicia, o que evidencia o interese pola escrita e o compromiso coa lingua galega no ámbito escolar.
Desde a organización quérese trasladar un especial agradecemento a todo o alumnado participante, así como ao profesorado e aos centros educativos implicados, polo seu labor na promoción da lectura e da creación literaria. Do mesmo xeito, recoñécese o compromiso do CPR Carmelitas coa cultura e coa lingua galega, valores fundamentais para a formación das novas xeracións.
O apoio de entidades como Avigal, cunha forte vinculación co territorio e co desenvolvemento social, resulta clave para impulsar iniciativas que conectan literatura, educación e identidade cultural.
Parabéns a Matías, á súa mestra, ás súas compañeiras e compañeiros, e a todo o equipo educativo do CPR Carmelitas.
